ꌗꑌꌠꆀꃅꈎꏅ
ꁱ：ꀊꆺꐒꍅ
ꀘ：ꑸꊉꑪ
ꑋꈌꀀꑌꇴꁧꃲ，ꃅꎸꈞꆈꐂꁧꃲ。ꃅꍵꇁꇫꑟ，ꃅꆳꌕꄲꇁꇫꑟ，ꋍꄲꈌꄸꉻꄉꇁ，ꁦꌺꈬꊯꈬꂷꏶꄉꇁ；ꋍꄲꑛꌋꈤꄉꇁ，ꐦꀞꐦꃀꈬꊯꈬꁕꈴꄉꇁ；ꋍꄲꇐꄸꉻꄉꇁ，ꎿꃀꎿꌺꈬꊰꈬꂷꐁꄉꇁ。ꃅꆳꌕꄲꌕꑍꌕꉖꀋꀀꀋꑌꃅꄉꇁꌊꆈꌠꋦꁍꑾꌋꈤꑟ。ꈎꏅꃲ！
ꋍꄲꁏꇁꁧꄩꌩꏪꌸ，ꌩꏾꌕꈈꀕꃅꆳꌌꌩꑭꅞ。ꌩꏾꌕꑍꃅꊸꃪꌕꉖꃅꆳꑄꊂꀊꃶꇤꊭꀕ。ꀉꂿꇁꌊꌩꏾꌕꑍꃬ，ꃬꌟꑳꉎꈉꄉ，ꌌꇁꃆꄔꅰꄉꈎꏅꃮꀠꎸꃚꀕꂿꄷ。ꋍꄲꁏꇁꇉꅶꅘꁧꅘꏾꌸ，ꅘꏾꌕꑍꌕꉖꐛꊂꅘꏾꏁꏪꀕ，ꀉꂿꒈꌦꀕꃅꏣꀨꎴꉘꎹꇁꆼꁠꏦ，ꉊꈯꎹꇁꇇꈐꊐ，ꅘꁧꃅꄜꋍꃤꒇ，ꂵꆪꋍꃤꀵ，ꁯꋒꐯꑎꄮꇬꋍꃤꎹ。ꅘꁧꌕꃤꀉꂿꎹꇁꑳꉎꄸꉺꅞ，ꌌꇁꈎꏅꃮꀠꐗꂿꄷ。ꉢꉪꈎꏅꃮꀠꐗꇁꏁꀣꀕꌠꄀꄮꉌꂵꌒꐯꌒ。
ꃅꈎꊰꑋꈓ，ꈎꈤꆏꏅ；ꃅꆪꊰꑋꆨ，ꆪꈤꆏꊒ。ꈎꈤꈎꏅꌕꑍꏅ，ꋠꇁꅝꅍꐥ；ꆪꈤꄔꊒꌕꑍꊒ，ꈩꇁꀜꅍꐥ。ꉌꈎꀕꈤꈎꏅꄮ，ꈌꄸꉻꃅꆳꇁꌊꉠꄹꌕꑍꁹꇈꑾꌋꈤꏯꉜꄉꁧ，ꉡꆹꉌꎭꆳꊂꑌꇈꃲ；ꑛꈎꀕꈤꈎꏅꀊꋩꄹꈎ，ꑛꌋꈤꄉꇁꌠꃅꆳꇁꌊꉠꄹꌕꉖꁹꇈꆀꃅꈎꏅꃮꀠꉜꄉꁧ，ꉡꆹꑓꊰꆳꊂꉆꇈꃲ；ꆿꈓꈎꈤꈎꏅꂯꄉꌦ，ꇐꄸꉻꄉꇁꌠꃅꆳꀊꋨꄲ，ꄡꇗꀋꅓꉇꇁꌊꉷꃅꁡꇤꏦꎫꇓꈓꑟ，ꇇꌌꉠꏯꉈ，ꑓꏯꉠꏯꉜ，ꈂꀸꉠꏯꌧ。ꉡꆹꀋꂿꎴꀋꈨꎴꃅ，ꀑꏾꈎꄉꑓꋪꉢꏮꌋꏯꉜꇈꇇꁄꉢꄹꈥꇤꀕꌠꆞꑭꐣꁙꇬꊐꄉ，ꑊꀋꏦꃅꇐꄸꉻꄉꇁꌠꃅꆳꀊꋩꄲꌋꆀꐯꏍꁧ。
ꃅꆳꌕꄲꌠꇁꌊꄉꉠꄹꑟꄮ，ꉌꂵꀋꁏꄮꀋꐥ，ꉌꂵꁏꄮꎧꏸꐝꍠꀕꌠꌕꍔꅜꑟꁈ。ꄚ，ꐣꁙꈥꇤꀕ，ꉌꃀꈺꍠꀕ。ꑠꃅꑴꇬ，ꆀꃅꈎꏅꐛꒌꑓꐛꇁꄮ，ꉌꂵꊷꆣꀕ！ꉷꃅꐥꄉꆀꃅꉂ、ꀿꃀꉂ、ꈎꏅꉂ、ꏣꑟꉂ、ꁡꇤꐋꀉꆹꉂ…
ꀉꄉꃮꌉꅅꃅꏠ，ꎸꐡꄄꀱꍧ；ꀉꂿꑲꌩꇣꄉꐺ，ꋙꃅꒉꑽꐺ；ꅫꃀꎸꄽꌌꒈꏾꒉꉱꍅ，ꀊꈪꀊꏢꒈꋌꌠꉠꑓꐛꇁ… ꃮꀠꌉ、ꎸꃚꀕ、ꎧꏸꑵ、ꌧꈿꁉꈿ、ꌒꃅꌒꅇꄜ…ꉠꑓꐛꇁ，ꉌꃀꁦꉘꀕꇈꊷꆣꀕ。ꃅꆳꌕꄲꆹꌊꉪꏤꃅꈋꑟ，ꋍꄲꃮꎸꅗꇁꃅꊸꆗꐷꈭꑌꏭꐛ，ꋍꄲꎧꏸꑱꇁꇣꁁꃆꄔꃪꇫꑌꏭꐛ，ꋍꄲꉌꇿꑓꇿꑳꈫꑳꇋꐂꀥꐺꏭꐛ。ꉡꆹꃅꆳꋍꄲꐛꑟꁈ，ꆿꈐꆿꌺꐛꑟꁈ，ꆿꊋꑌꆿꌗꑋꑟꁈ…
ꀒ！ꆀꃅꈎꏅꋬꂻꏅꈨꅪꏅ，ꋯꑌꏅꃯꉻꏅ，ꊋꑌꏅꌗꑌꏅ，ꀻꎆꏅꌄꆣꏅꅊꇈ！ꈎꏅꇀꄮ，ꃅꆳꌕꄲꆀꃅꌗꊐꌗꆦꇁ，ꌗꑌꌠꆀꃅꈎꏅ，ꈎꏅꁧꀋꄐꑴꇬ，ꉌꂵꊷꆣꀕ！
2023彝历新年即将到来，凉山广播电视台为了弘扬中华优秀传统彝族节庆文化，营造积极向上、和谐健康的彝历新年氛围，展示新时代彝人的精神风貌，特向社会征稿。
一、稿件要求
1.用彝文写作，文体不限，字数不限。
2.内容与彝历新年有关。
3.以电子文档投稿。每人限投一篇未曾公开发表的原创作品，不得重复投稿；
4.严禁抄袭，否则由此带来的一切后果自负。
三、投稿方式
1.征稿日期：2023年11月10日至11月17日
2.稿件注明作品署名，稿末注明真实姓名、电话，以上信息缺一不可。
3.投稿邮箱：75455684@qq.com
四、用稿稿酬
所有稿件一经录用，将酌情付一定的稿费。
凉山广播电视台彝语中心
2023年11月9日
